廉署風波觸發 林卓廷梁粉隔空開火

【明報專訊】近期廉政公署爆出人事大地震，仲燒到去特首梁振英（CY）收受UGL公司5000萬元款項事件，而做過廉署調查主任嘅林卓廷，近日就成為爆料天王，包括披露有首席調查主任辭職，啲料都算堅。不過，唔少「梁粉」同支持CY嘅媒體，就對阿廷口誅筆伐，質疑阿廷以前喺廉署其實好低級，係咪夠班評論廉署高層人員調動。


計劃出選立法會新東議席嘅阿廷就唔服氣，反駁話如果咁嘅邏輯都成立，「咁咪全世界都唔評論得梁振英，除咗董建華同曾蔭權。」阿廷又話，佢嘅廉署朋友對一姐未能坐正執行處首長一事非常憤慨，有人搵佢爆料，指控合情合理，所以佢都應該出聲話畀公眾知道。佢又反駁梁粉，不如叫CY解釋清楚收取5000萬一事好過。


講番選舉，新東都有唔少人馬參選，好似本民前梁天琦噚晚喺區內蒐集提名，準備今日報名。工聯會鄧家彪宣傳就玩食字，口號係「爭氣Bill Up」。民建聯葛珮帆就話參選宣言係上善若水，話要謙卑、包容、剛柔並重喎。