$280一鋪荔園高卡車 玩前要上堂

【明報專訊】闊別咗大家18年嘅「荔園」舊年喺中環海濱重開，唔少朋友仔都同Emily講，幾鍾意入面嘅懷舊咖啡杯同叮叮船等遊戲。相隔一年，荔園今年就移師去亞洲國際博覽館舉行。比起中環海濱，位置的確無咁方便，不過荔園主席邱達根就話，咁樣都係為咗令大家玩得開心啲，因為今次大部分遊戲設喺室內，可以歎住冷氣玩，唔使日曬雨淋。


Emily噚日就先「玩」為快，入去睇睇21個遊戲同攤位。傳統咖啡杯同旋轉木馬就見唔到，不過就多咗啲新遊戲畀大家挑戰吓，最矚目一定係電動高卡車場XRace啦 !


Emily噚日就玩過XRace，除咗喺30℃高溫之下帶住頭盔，感覺焗啲之外，賽車又真係幾刺激。不過玩之前首先要上堂10分鐘了解吓點樣控制架車，又要知道賽道上嘅工作人員揮舞唔同旗幟代表咩意思 ! 大會話為咗安全，工作人員仲會用遙控裝置控制大家嘅車速，一定唔會高過每小時50公里。


至於入場費就要180元，包10個金幣，平均每個遊戲要收3至6個金幣，XRace賽車就再貴啲，要280元一次，貴唔貴就見仁見智啦。