立選被問撐梁點算好？ 主席教攞分：支持曾鈺成

【明報專訊】唔少建制派相信喺立法會選舉上，都會被要求表態，究竟係咪支持特首梁振英連任嘅問題，相信好多人都好頭痕，噚日立法會舉行特首答問大會，議員林大輝仲要求CY教建制派點答，CY叫大家實事求是，相信呢個答案，建制派就未必會用喇。一班記者噚日就請教立法會主席曾鈺成，建制派應該點答呢？


常被問參選「好難無動於衷」

出名智慧高嘅曾主席就笑言：「答『我支持曾鈺成』，就可以攞晒分！」喺隔離無黨派議員黃毓民就大笑話認同，話支持「四號仔」。何解叫四號仔？近日政圈談論選特首問題，除咗CY、政務司長林鄭月娥同財政司長曾俊華，曾主席嘅大名亦係討論之列，而近日曾主席亦改口風，叫大家「拭目以待」。


除咗拭目以待，前日無綫新聞播出曾主席訪問，曾主席話幾乎每日都有人同佢講，叫佢認真考慮出嚟選特首，「呢啲說話聽得多，亦唔可能無動於衷」。


講番答問大會，噚日工聯會郭偉強罕有咁激，拎住CY政綱追數，批評佢將政綱拋諸腦後。郭偉強話都有諗過當場撕爛政綱，但覺得太激，對於火併特首係咪因為有選票壓力，佢就話「可以咁理解」。工聯會榮譽主席陳婉嫻就大讚郭係最有火嘅接班人，百分百代表到勞工心聲。