梁繼昌 做法案帳委會有成就感

【明報專訊】本身係會計師同律師嘅公專聯梁繼昌（Kenneth）平時做嘢都成日睇文件，原來佢喺立法會都唔例外，佢噚日埋單計數，發現自己過去4年擔任咗足足12個法案委員會主席，又做埋帳目委員會成員，完成57個聆訊，全部都耗時耗力。佢話，雖然有啲議員覺得好複雜，不過佢就覺得好有意思。佢話，明白做無黨派議員唔可以主導政治事件，但做到呢啲嘢都有啲成就感。尤其係佢擔任男士侍產假委員會主席個陣，開咗7次會就擺平勞工、商界等各方利益，最後成功喺立法會通過。


對於唔少法案例如版權條例、醫委會改革上咗大會先觸礁，Kenneth話，其實背後好大原因，係委員會主席事前無做好工夫同各方溝通。佢話，如果主席只係機械式主持會議，就好難成事，又用版權條例做例子，話做主席嘅陳鑑林唔知道條例癥結喺邊。雖然今屆立法會即將完結，不過Kenneth已經技癢，心思思諗緊下屆不如搞埋醫委會私人草案。咁講法，似乎Kenneth對選舉都好有信心喎！