醫生赴黎巴嫩當義工 籌款目標未達 紅會再籲捐助敘難民

【明報專訊】家有啲人只識講本土，其實愛心應該無疆界。香港紅十字會就發出呼籲，話敘利亞5年戰火令生靈塗炭，導致逾25萬人死亡，仲有好多難民流離失所，呼籲港人易地而處，慷慨捐款，為敘利亞家庭提供更多援助。


香港紅會秘書長蘇婉嫻話，國際紅會正向全球籌募48億港元，以支援敘利亞災民，但目前籌得款項不足所需嘅一半。香港紅會之前3次呼籲，共籌得200多萬港元，令到2.2萬災民受惠，包括提供禦寒衣物及緊急食物包。


香港紅會多次派員去當地幫手，包括醫護義工、骨科醫生張堅穎。張醫生去黎巴嫩協助照顧逃難而至嘅難民，佢就話現時有超過100萬名敘利亞難民喺黎巴嫩，黎巴嫩本身醫療系統並不足以支援，所以需要各界支援。熱心市民可以多種渠道捐款，詳情可瀏覽www.redcross.org.hk。