茶敘慰勞職員 曾鈺成總結 毓民「欠」立會秘書處最多

【明報專訊】今屆立法會會期本周五結束，4年嚟面對拉布、議員嘅激烈抗議，相信最辛苦嘅人一定包括秘書處職員。噚日立法會搞茶敘，唔少議會秘書、保安等都有出席，立法會秘書長陳維安讚一班職員呢4年勞苦功高，希望大家暑假可以唞唞，陪吓屋企人。茶敘仲有兩大隻燒豬，由內委會主席梁君彥贊助。


過去立會會期完結，都無試過搞呢類茶敘嘅，原來今次嘅主意來自民主黨主席劉慧卿。卿姐話自己都即將離別議會，所以諗起職員都好辛苦，希望搞個聚會表達小小心意。


CY答問會 楊岳橋可優先提問

噚日一班議員同職員齊齊切燒豬，又影大合照，影相時個個舉起拇指，獨立議員黃毓民就話﹕「呢個like係畀秘書處嘅！」喺隔籬嘅立法會主席曾鈺成隨即笑言，毓民係第一個要多謝秘書處，因為秘書處人員為佢一人做嘅工作，相信係其他議員嘅總和。咁又係嘅，無論立法會大會定財委會，毓民都不時提出大量修訂拉布，亦經常喺議會內抗爭，真係辛苦咗一班職員。


特首梁振英（CY）聽日（周四）就會出席今屆立法會最後一場特首答問大會，據知泛民一如既往當日會有抗議行動「招呼」CY，但要賣個關子先。而根據答問大會慣例，過去發問次數愈少嘅議員可以優先提問，所以今年2月喺新東補選中晉身議會嘅公民黨楊岳橋最着數。


楊岳橋就話仲度緊問題，想問啲實際嘢，擔心如果透露咗，CY可以提前準備，聲稱唔想畀CY用標準答案蒙混過關。工黨就會針對最近廉署人事大地震、執行處「一姐」李寶蘭被取消署任問到底。


立法會選舉前夕，建制嘅工聯會都唔會手軟，繼續就退保、強積金對冲等議題「追數」，郭偉強仲笑言係咪需要學吓泛民咁，用掟嘢以示抗議憤怒。