旅局菲律賓宣傳 出動雞蛋仔名店

【明報專訊】香港嘅地道小食係唔少旅客嘅必試之選，旅發局前排參與菲律賓馬尼拉Travel Madness Expo（TME），就邀請咗獲米芝蓮推介嘅「媽咪雞蛋仔」同行，即場炮製雞蛋仔畀當地市民試食，攤位亦設計成小食店，短短3日展期派出2000份雞仔。媽咪雞蛋仔創辦人Irene同店主Noelle話，馬尼拉市民試食完雞蛋仔，好多人問佢哋舖頭喺邊、會唔會去馬尼拉開店，佢哋都好開心，希望畀更多外國人認識雞蛋仔。


曾來港旅行嘅馬尼拉人Kaye就覺得，食到雞蛋仔令佢有啲掛住香港。旅發局已決定繼續邀請「媽咪雞蛋仔」參與日本、德國等地嘅旅遊展。


今年上半年，旅發局喺菲律賓重點推廣家庭旅遊同短暫旅遊，首5個月菲律賓訪港客比去年同期升14.1%。而喺TME供即場購買香港機票或旅遊套票人士免費換領嘅限量版手信袋，2000幾個名額全部換領完畢。