大家樂高層 齊齊加人工

【明報專訊】大家樂（0341）早排公布舊年業績，賺少咗12%，但噚日份年報披露，原來羅開光等幾位羅氏高層舊年齊齊加人工。新任主席羅開光份糧就加咗6.2%，年薪241.8萬元，不過生意下滑，花紅分少咗接近20%，得番932.1萬元，令佢舊年總酬金縮水16%，剩番1186萬元。


羅碧靈轉非執董 董事袍金加至18萬

不過佢堂侄羅德承就威威，去年9月升職做副首席執行官，年薪升咗成倍咁滯，袋276萬元，連花紅都有增加，所以總酬金比前一年多成72%，有401.8萬元，今年羅德承再升埋做首席執行官，睇怕份糧仲有得加。


至於羅開光胞姊、大家樂執行董事羅碧靈，總酬金都加咗6.6%，即361.3萬元。不過，羅碧靈會響今年9月轉做非執行董事，到時人工幾多就要再傾，但董事袍金就會由5萬變做18萬。


[小琴密語]