觀瀾湖新城「藝工場」 廉租吸港青創業 總裁透露同佔中有關

【明報專訊】深圳觀瀾湖係全球最大嘅高爾夫球場，原來觀瀾湖集團主席兼行政總裁朱鼎健（Ken）於上年底開幕嘅深圳觀瀾湖新城，除咗商場同綜合設施外，亦有「藝工場」，希望可吸引中港台青年發揮所長創業，以便宜租金協助佢哋將產品打入內地市場。Ken有呢個意念，原來都同佔領運動有關。


本身係全國政協委員嘅阿Ken話，喺前年佔領運動期間，去過觀塘一工廈參觀「市集」，見到唔少青年喺嗰度賣自家創作手工製品，令佢覺得感動，認為年輕人都大有作為，但就未必識創業做生意，所以佢經營呢個藝工場，以優惠價吸引香港青年北上，賣作品之餘，亦可多了解內地發展；而剛過去嘅周末，觀瀾湖就同青年協會合作，喺商場擺市集，現場所見都有唔少人參觀。


話大嶼山可參考觀瀾湖發展概念

除咗市集外，觀瀾湖新城亦有TOK博物群，有幾幢4層高大廈，以展出藝術品或手工藝品，好似有鐵皮玩具展、畫展，亦有剪紙作品展出，當中部分屬香港人嘅作品。而該區亦希望吸引香港人上去開舖，例如有健身教練就創業，開設健身中心；本港創作品牌G.O.D（住好啲）亦喺該處開店，係全國首間分店。觀瀾湖算得上係綜合旅遊發展區，近期成為大嶼山發展諮詢委員會委員嘅阿Ken相信，大嶼山亦可作類似發展，特別係香港缺少冒險、生態旅遊呢啲賣點，但香港係有潛力發展嘅。


今年奧運有高爾夫球項目，上一次已經係112年前，而喺香港土生土長嘅女將陳芷澄更有機會代表香港出戰。高爾夫球作為觀瀾湖嘅重點，觀瀾湖集團副主席朱鼎耀就話，佢哋都有3個球場免費開放畀青少年球手做培訓，除咗高球，嚟緊仲會開網球學院，邀請埋德國網球名將碧加出席。