首屆揭幕 亞洲國際動漫節現簡體福袋

【明報專訊】香港動漫迷想買漫畫、動漫精品，今年有多一個選擇喇！首屆亞洲國際動漫節噚日喺九龍灣國際展貿中心揭幕，吸引咗超過100名動漫迷排隊入場。除咗常見嘅漫畫、精品等，場內最搶手嘅係動漫人物「福袋」，福袋內有多款精品，可以一次過滿足動漫迷嘅願望。


動漫迷唔介意

Emily仔細一睇，見到福袋上嘅動漫名稱用咗簡體字，另外仲有部分內地參展商賣印有簡體字字樣嘅T恤，都有唔少人上前查詢㗎。有動漫迷同Emily講，唔介意產品印簡體字，最緊要產品上面有印上動漫角色就足夠。


呢個動漫節由亞洲動漫文化產業協會舉辦，協會會長周家恆留意到本港另一個大型動漫節已變成「遊戲展」，與漫畫相關嘅攤位愈來愈少，話希望今次活動可以畀香港人一個「真正嘅」動漫節，佢仲期望喺呢4日嘅展期內可以吸引5000至6000人次到場支持。