保釣會20周年晚宴 曾鈺成送墨寶籌款

【明報專訊】保釣行動委員會聽日（周六）舉行20周年籌款晚宴，保釣呢個國家大是大非問題，泛民、建制立場都算一致，立法會主席曾鈺成就送咗一幅「還我釣島」嘅墨寶畀保釣委員會，作籌款之用。


保釣委員會成員曾健成（阿牛）話晚宴喺旺角倫敦大酒樓舉行，到時會筵開60席。聽晚會有唔少嘉賓出席，包括左中右人物，好似曾鈺成、何君堯、史泰祖、梁國雄、何俊仁、余若薇等。


喺2011年，梁振英未做特首前，曾經送過一幅《清明上河圖》仿製品畀保釣行動委員會作籌款拍賣，今年無呢支歌仔唱喇，不過都有唔少珍貴拍賣品。除咗曾主席墨寶，仲有漫畫家馬龍捐出嘅作品、釣魚島紀念瓶，以至專程由內地運嚟香港嘅釣魚島啤酒。阿牛話全部都係無底價拍賣。