海賊王今迎賓 13米高滑梯考膽識

【明報專訊】日本人氣漫畫《海賊王》嘉年華，今日起到下月7日進駐中環海濱，成人只需50元，就可以走入海盜世界，同主角路飛，或者佢同伙伴嘅海賊船「烈陽號」合照留念。未夠喉？嘉年華引入4個大型戶外體感障礙賽遊戲，全部以漫畫主角為主題，雖然無得出海，但喺陸上濕住身過關一樣咁刺激！


第一關係「路飛橡皮槍彈拳頭陣」，參加者要避過「超長手臂」橫掃；「索柏毛皮強化彈彈球」就要跳過4個彈彈波，考驗平衡力。緊接「狙擊王烏索普的槍林彈雨」同「鐵人芬奇超Super鐵人滑梯」，後者要喺旋轉盤跳去另一個旋轉盤，再喺4.5米高台滑下。遊戲要另外收費，200元玩一次；全日通400元則可無限次挑戰。


場內另有13米高、坡度接近90度角嘅超高滑梯，少啲膽量都未必夠膽滑落嚟。嘉年華仲有《海賊王》主題攤位同特色小食，粉絲可以喺場內買到限定紀念品。