賀林建岳中菜館開幕 唐唐教大廚上蝦要剝殼

【明報專訊】全國政協常委唐英年（唐唐）出名愛酒，而美酒要配佳餚，唐唐噚日出席佢老友、旅發局主席林建岳（岳少）新開張，位於尖沙嘴嘅中菜館「唐人館」剪綵儀式，試菜之餘更獲廚師大笠高帽。原來唐唐曾經試過大廚手勢，其中有道「花雕話梅蝦」，唐唐試食時覺得啲蝦連殼上，食客要剝殼就會整污糟對手，佢教大廚剝咗殼先上，令食客方便啲，最後大廚聽佢建議改良。


話從未聽過欽點特首

除咗講美酒佳餚，唐唐亦有回應時事，立法會主席曾鈺成日前接受訪問時，話有京官向佢提過新一屆特首選舉唔會再有「欽點」；2012年參選特首落敗嘅唐唐，噚日被問到有無聽聞京官欽點之說時，佢就話「我從來無聽過欽點」，話自己一向覺得特首選舉係公開公平嘅安排，有信心選委會委員有獨立思考投票能力。


講番食，中菜五花八門，唐唐噚日同大家分享酒經，教大家有咩酒啱配中菜，佢話中菜配酒不宜味重，否則就會蓋過菜式嘅味道，建議用法國、西班牙或者意大利酒。除咗唐唐，同樣識飲識食嘅前經濟發展及勞工局長葉澍堃噚日都有捧岳少場，經常寫食經、出名嘴刁嘅葉澍堃，試菜時相當畀面，形容大廚碟少爺豬扒飯係自己「食過最好食」嘅。