黃容根退黨選漁農界

【明報專訊】民建聯近期多事，立法會議員鍾樹根同漁農界前議員黃容根（圖）都有意退黨獨立出選，雖然民記最終成功掂「樹根」留黨，不過「容根」就決定「真分離」。根叔同Emily講，今日會向民建聯申請退黨，聽日會搞記者會宣布參選，挑戰同係民建聯嘅現任漁農界議員何俊賢。佢話自己要退黨嘅傳聞都傳咗近兩個月，但至今中聯辦同民建聯都無人搵過自己，直言「都無人睬你，仲留喺度做咩呢？」


其實黃容根1998年起擔任3屆漁農界議員，上屆因民建聯高層決定，最後退位讓「賢」。不過根叔就對何俊賢4年工作表現十分不滿，批評好多業界訴求對方都不理不睬，最後搞到要搵其他政黨求助。佢話唔少業界都希望自己重出江湖幫手發聲。


何俊賢就話，現時就係咪出選仲徵詢緊業界意見，若反應正面就去馬。但佢話人無完人，願接受批評，但相信若黃容根要挑戰自己，自然唔會講自己好話。