兩餸一湯價格指數 楊屋道街市平咗 厚德邨最貴

【明報專訊】工聯會日前公布製作「兩餸一湯」價格指數期間發現，好多領展街市都買唔齊菜心炒牛肉、梅菜蒸鯇魚同番茄薯仔瘦肉湯嘅食材，原因係好多領展街市無鮮牛肉或鯇魚賣；噚日佢哋有第二擊，喺18個抽查嘅街市當中，14個買齊兩餸一湯食材價格平過舊年，其中住荃灣市民就有福，因為楊屋道街市嘅食材價格跌得最多，原本買晒上述食材要112蚊，家只需98蚊。工聯會估計同內地食材入口價平咗有關。


不過工聯會話買得齊所有食材嘅領展街巿，價格唔止無平到仲貴咗。以將軍澳厚德邨街市為例，買齊上述食材貴舊年5個半，要109.75元，係18個街市中最貴，工聯會立法會議員麥美娟鬧領展壟斷商場同街市，令市民無得揀。


領展﹕菜心番茄零售價升咗

不過領展同Emily講，話政府零售數據顯示，菜心同番茄零售價按年升五成同兩成，質疑今次調查數據嘅真確性，仲話翻新咗嘅街市，食材有時賣得平過政府管理嘅街市