馮檢基微電影 曬18年追妻史

【明報專訊】有意轉戰新界西直選嘅民協立法會議員馮檢基（阿基），噚日發布講述自己「深耕細作」、長10分鐘嘅「微電影」，但並唔係講地區工作，而係佢死心塌地用咗18年先追到現任老婆嘅愛情故事。


太太唔願上鏡

微電影係改編自阿基親身經歷，原來佢喺大學時認識現任老婆，對佢萌生愛意，可惜神女無心，阿基多次表白失敗，直至阿基喺英國留學返嚟，脫胎換骨，最終憑毅力打動到女方，前後花咗18年，可謂「癡心情長劍」。


阿基喺微電影度粉墨登場做番自己，但馮太唔願上鏡，由演員代替。阿基話早前同朋友食飯，認識製作公司嘅人，仲送咗本自傳畀對方，對方對呢段情史感興趣，故拍成「微電影」，仲會喺本地一個電影節參展。


何君堯尋求鄉局撐選新西

另一邊廂，鄉事組黨仍死心不息，仲積極搵人參選新界西。不過，有意參選新西、有鄉事背景嘅屯門區議員何君堯睇準機會，近日密密尋求鄉議局同鄉事支持，佢話會喺報名期前約見所有新西鄉委會主席，加強與鄉事溝通。雖然何君堯曾同鄉議局前主席劉皇發及鄉議局有芥蒂，不過佢噚日就話呢啲「俱往矣」，佢前日仲同剛剛當選番屯門鄉事委員會主席嘅「發仔」劉業強恭賀。何君堯又話，百分百支持主席劉業強出選立法會鄉議局界別，希望可同對方喺立法會內外合作。