早前「張德江專享」 28萬元大嶼模型 預約有得睇

【明報專訊】全國人大委員長張德江訪港期間，發展局曾向佢展示一個大嶼山發展實物模型，上面見到中部水域人工島嘅輪廓同道路連接等，由於呢個模型從未公開展示過，外界質疑當局係咪隱瞞發展內容，畀領導人「獨家」參觀。發展局長陳茂波噚日回覆工黨立法會議員張超雄書面質詢時話，模型用咗28萬元製作，由於5月中先完成製作，所以無法喺1月至4月舉行嘅大嶼山發展公眾參與活動中展示。


放喺土木署會議室

陳茂波又話，模型用嚟向張德江介紹大嶼山發展嘅初步主要建議。佢話模型中展示嘅交椅洲一帶填海位置同面積，只屬概念性質，具體建議要等進一步研究後先可確定，而人工島嘅研究就要等立法會批准撥款後先可展開。陳茂波話，模型家放置喺土木工程拓展署港島及離島拓展處會議室入面，市民可以去參觀，不過要先打電話預約。