新地捐元朗萬呎地 建長者青年宿舍

【明報專訊】新鴻基地產噚日同香港聖公會簽訂土地捐贈合約，捐出元朗西鐵站附近、面積約1萬平方呎嘅地皮，畀聖公會起一幢綜合服務大樓，裏面除咗有長者院舍外，仲會有特殊幼兒中心、青年宿舍同教堂等。整個項目預算建築費用約3億，預期2019年開始施工，2022年至2023年正式啟用。


青年宿舍設於大樓高層，共有11層，合共約160個房間。宿舍有單人房同雙人房，單位面積介乎15至20平方米。除兄弟同姊妹組合，亦可租畀已婚嘅年輕人。香港租金咁貴，Emily同好多年輕人都好關心宿舍嘅租金。香港聖公會福利協會總幹事李正儀就話，家講唔到2023年嘅市值，但若果以今日嘅市值六成左右，估計租金係2000幾蚊。而根據民政事務局政策，租客最長可以入住5年。


民政事務局話歡迎新地捐地，認為隨住更多非政府機構推出青年宿舍項目，相信可以畀更多在職青年實踐擁有自己居住空間嘅願望，並提供機會畀青年為日後發展儲多啲錢。勞工及福利局長張建宗同樣歡迎新地捐地，又話政府會協助非政府機構發展各種所需嘅社福設施。