家騮怪醫性格巨星 郭家麒：拉布人才

【明報專訊】最近醫委會改革爭議令平日神龍見首不見尾嘅醫學界議員、被稱為「怪醫」嘅梁家騮曝光大增。同樣都係醫生嘅公民黨郭家麒就大爆梁家騮「秘史」，話怪醫當年喺威爾斯親王醫院做實習醫生，已經相當獨特，巡房總係遲過大老細現身，郭家麒當年有提過怪醫早啲現身，但怪醫依然故我，所以郭家麒已經對怪醫見怪不怪。


郭家麒話，怪醫決定咗一件事，就會全力去做，無人阻到，形容怪醫唔理外界嘅性格，絕對係「拉布人才」。不過，喺醫委會條例爭議上面，郭家麒話怪醫完全無聯絡過佢，所以唔知怪醫會出咩招數。


積極考慮競逐連任嘅郭家麒噚日帶埋計劃排第二出選嘅地區主任冼豪輝同大家見面。冼豪輝今年24歲，今年喺理工大學畢業。冼話已經幫咗郭家麒3年，希望吸收吓經驗。


另外，新思維噚日同傳媒茶敘講選舉部署，新思維秘書長黃俊瑯透露打算轉戰九龍西，加入主席狄志遠（阿狄）嘅名單出選，但就話黨未決定佢排第一定第二。新思維同民主思路都有意派人選九西，阿狄話，自己正積極同民主思路召集人湯家驊傾選舉協調，而雙方已經有一個「最後選項」擺咗上枱討論，但阿狄唔肯講詳情，話最終協唔協調到，嚟緊星期六（9號）會員大會前就知。


民主思路話，一直同唔同黨派，包括新思維就立法會選舉互通信息，強調無同任何黨派就選舉有任何協議。