有話說﹕專家教路 4招迎升中放榜

【明報專訊】今日係升中放榜嘅大日子，Mama作為家長，都好戥一班小六同學仔緊張。升到心儀中學固然開心啦，萬一仔女派位結果唔理想，家長可以點樣應對呢？Mama同聖雅各福群會延續教育中心經理劉遠章傾過，佢向各位家長傳授四部曲，去陪仔女面對呢個重要關口。


首先亦係最重要一點，家長一定要調校好心情。每年放榜前都會公布總體成績，當聽到有八至九成學生派獲首三志願，家長難免會抱有期望，相信仔女有份派到心儀學校。不過有人歡喜總有人愁，無論結果係點，都記住佢哋已經盡咗力，千祈唔好表現得好心急丶好躁，「快啲行啦！要去叩門喇！」呢一類說話，就少講為妙喇；亦要控制表情動作，以免仔女以為係自己做錯事，令父母失望。


第二步係詢問仔女意願，雖然派位結果不如預期，佢接唔接受到呢？劉遠章建議，如果小朋友接受到，唔介意入讀呢間學校，家長可以尊重佢嘅決定，「到咗升中嘅年紀，基本上已經大個，差唔多進入反叛期，唔好乜嘢都由家長操控」。否則就算逼佢去叩門，佢都未必表現得積極，面試成功嘅機會亦會減低。


唔想叩門 逼都無用

不過，仔女表達想叩門嘅話，家長當然要陪埋一齊去啦，呢個亦係第三步。家長陪伴唔單止表達緊支持，更重要係觀察仔女嘅狀態。叩門冇一個標準，冇話要叩幾多間，只能靠家長觀察小朋友，到底佢係戰意高昂，定係身心俱疲呢？戰意高昂就去四五間都得，好攰就唔適宜頻撲，去一兩間都夠喇。家長要注意另一點，就係去到叩門學校，唔好不停催促仔女填表丶搞手續，反而要畀多啲時間，讓佢哋去觀察間學校，睇下鍾唔鍾意丶想唔想入讀。


最後一步係幫仔女接受現實。劉遠章話，香港絕大部分中學有齊基本硬件同資源，條件唔會太差，無論派到邊一間都唔使太沮喪。假設叩埋門都唔成功，家長可以花啲時間，同佢一齊發掘即將入讀嘅學校有咩優點，例如交通方便、體育好叻等，「唔好用一個冇得揀嘅心態入讀，否則入去讀六年，心裏面都唔情願，只會令自己辛苦」。