增生產力 金門建築引入機械臂

【明報專訊】將來機械人喺建築地盤工作，唔再只係幻想。金門建築總裁何安誠噚日同傳媒茶敘時，就話隨住本地建築工人老化同埋持續缺人，將一啲建築工序機械化可以提升生產力，亦可以減低工作風險。佢早前喺日本睇過一款「連身機械臂」，工人將「機械臂」著上身，就可以搬運更重嘅貨物，「例如平時每次工人只可以拎一包英泥或者磚，用咗機械臂之後可以拎兩包」。


何安誠話，每部「機械臂」造價由20萬至120萬元不等，佢早前去其中一間日本生產商視察，仲著上身試過，公司初步引入兩部「機械臂」，預計最快可於個半月後應用喺地盤。佢又話早前同特首梁振英會面時亦有提起呢款「機械臂」，覺得長遠建造業界都需要有一個「創新科技中心」，公司最近亦成立咗50人嘅跨部門「創新科技組」。


除咗機械臂，金門創新科技經理王鯤量話，公司正同本地大學同科研公司研發緊適用於地盤嘅機械人，包括用機械人喺地盤鋪磚、砌牆、焊接等，並會向政府申請創新科技基金資助，估計最快可於兩年後面世。