張國鈞做區議員 「犧牲」買遊艇錢

【明報專訊】立法會選舉前夕，唔少疑似參選人都藉唔同方式曝光宣傳。本身係律師嘅民建聯副主席張國鈞，最近出新書《MOCHA大狀——法律界的千奇百趣》，講吓行內趣事，噚日仲就新書同立法會主席曾鈺成對談。曾主席話張國鈞做咗16年律師，照計搵到嘅錢都可以買3隻遊艇，國鈞就話，如果專心搵錢，都有機會搵到買一隻遊艇嘅錢，最弊佢做區議員，又花唔少時間做黨務，唔係好多時間做律師。


國鈞話同客傾偈要收錢，做地區對街坊就要忘記錢，有好熟嘅街坊會搵佢證婚，佢唔止唔收錢，仲擺低埋人情。國鈞係事務律師，但今次書名叫「大狀」，佢就話因為坊間普遍都會叫律師做大狀，唔係嚴謹定義，佢希望利用虛構人物講法律界所見所聞，所以書名叫大狀。


講到港島區參選，黨友鍾樹根願意排佢名單第二，國鈞就話希望有最強名單，而樹根係猛將。問到有無信心拎兩席，國鈞就話無得計，一條隊要拎兩席，根據過去經驗除咗自己要勤力，亦要對手失誤。


除咗國鈞，有意出戰超級區議會議席嘅民建聯副主席周浩鼎，噚日就伙拍新民黨容海恩，成立「反壟斷、保民生關注組」，關注燃油市場反競爭行為、領展「賺到盡」等議題。佢哋同樣有律師背景，但就唔同黨派，雖然兩人都否認成立關注組係為選舉鋪路，但兩人選舉上唔知有無合作空間呢？