幫港出聲繞山頂 申請健力士

【明報專訊】「幫港出聲」同「保普選保和平大聯盟」噚日喺太平山頂舉行「『中國人．驕傲』正能量．團結太平山」活動，手牽手圍繞山頂，沿盧吉道同夏力道，聲稱繞成咗一個大約3.5公里嘅大圈，兩個組織領頭人周融話活動有大約5000至6000人參加，會申請打破健力士世界紀錄，預料幾星期後有結果。


周融話，希望透過活動令香港同全世界知道，作為中國人係「值得驕傲」，希望香港有更多正能量、更少仇恨同怨氣，而幫港出聲喺活動完成後會捐50萬元畀一間中醫診所。新界社團聯會等多個社團組織都派代表出席活動，但就未見官員參加，活動前有默哀環節，悼念喺迷你倉火災殉職嘅兩名消防員。


另外，民陣日前公布今年七一遊行有11萬人出席，被問到人數比去年上升係咪代表市民更不滿政府，周融就質疑民陣數字，形容民陣「報大數，水分多到離晒譜」。周融去年曾經質疑港大民研有份做嘅三大滾動政改民調，不過對於今年七一遊行數字，周融就有唔同睇法喇，話「如果你哋大家要信，請大家睇睇港大嘅數字」，以及警方嘅數字，兩者都唔超過3萬人咁話。