政府訪工程師唱好基建

【明報專訊】近年政府推出嘅大型基建，特別係港珠澳大橋同高鐵，多番被揭超支同延期。唔知係咪想挽回公眾形象，政府新聞網噚日就訪問有份參與港珠澳大橋、高鐵同埋機場第三條跑道嘅工程師，仲話佢哋3個要面對「海陸空三種挑戰」，認真大陣仗。


受訪嘅3名工程師，包括有份參與港珠澳大橋人工島填海工程嘅路政署工程師關慕賢，佢話由於工地鄰近機場，受到高度限制，施工有一定掣肘，佢哋要同承建商緊密聯繫包括改裝機器，以符合高度要求。參與高鐵項目嘅路政署高級工程師司徒侃然就話，高鐵沿線地質複雜，令隧道挖掘工程進度容易受到影響。


3個工程師不約而同話有份參與大型基建感到自豪，但訪問片段無提到社會關注嘅基建超支問題。呢段訪問片段一上載到facebook，即時有唔少網民留言，有網民批評政府耗資大量公帑投資基建，另一邊廂就話要削減醫療資源。亦有網民叫政府不如叫啲工程師講吓，港珠澳大橋人工島嘅「飄移」問題會唔會構成實質危險。