新委海濱事務委員 兩人罕有連任

【明報專訊】政府噚日公布特首委任5人做海濱事務委員會成員，佢哋分別係蒲祿祺、吳永順、陳遠秀、羅揚傑同顏汶羽，而蒲祿祺同吳永順早於2010年開始已經係海濱事務委員會成員，今次罕有獲連任後，再延長一年任期。


問到身兼香港建築師學會會長嘅吳永順點解會有咁嘅情况出現，吳永順講笑咁話﹕「你點解唔問政府？」不過佢都話相信因為政府即將換屆，又想好啲咁過渡成立海濱管理局，而佢又比較熟悉，所以就叫佢做多一年，方便過渡。


由2010年已經做海濱事務委員會主席嘅蒲祿祺，同埋非官方委員吳永順，今日起延長任期1年，至下年6月30日，完成6年任期後繼續「連任」。


海洋公園公司前董事局成員陳遠秀、GP電芯太子爺羅揚傑同民建聯區議員顏汶羽獲委任為新非官方委員，任期兩年，其中顏汶羽話畀Emily知，之前一直關注觀塘海濱事務，不時都有參與呢個會嘅活動，家做埋委員就要多溫書，了解埋其他地方嘅海濱事務。