濕身消暑 海賊王7月襲中環海濱

【明報專訊】今個暑假香港多樣消暑玩意！中環海濱活動空間有亞洲首個戶外大型嘉年華「海賊王．夏日激航狂歡世界」（One Piece Summer Carnival），邊濕身邊玩刺激嘅體感障礙賽遊戲（Action Game），嘉年華更以日本動漫《海賊王》 （One Piece）做主題，嘉年華下星期五（7月8日）開始，為期31日，最矚目嘅係13米高滑梯，瀡落去時更會被拋高再跌落軟墊！

呢個嘉年華嘅設計團隊We Love Carnival Ltd係本地公司，當中兩名成員林文安和黃志偉經常擔任演唱會監製，今次搞嘉年華，係想為社會帶啲輕鬆正面嘅能量，同時借海賊王嘅故事命題，鼓勵大家要有冒險精神。


嘉年華嘅戶外體感障礙賽遊戲都以海賊王唔同角色設計，除咗有13米高滑梯，亦有船形滑梯障礙賽，但部分遊戲設身高同年齡限制，亦設兒童區。入場費50蚊，但就要再畀錢玩遊戲；或者係買「全日通」門票（星期一至五400蚊，星期六或日500蚊），就可入場任玩7個指定遊戲。詳情可瀏覽網站（www.onepiececarnival.com）。