嫻姐曬舊參選單張 笑稱形象似游蕙禎

【明報專訊】工聯會立法會議員陳婉嫻2008年後無做議員，2012年就循「超級區議會」界別重返議會，今年9月又再選舉，但年近70歲嘅嫻姐就表明自己百分百唔會再參選喇，相信亦唔會幫工聯會成員「抬轎」排第二。從政近30年，經歷過多場選舉，嫻姐話最近整理office時搵到自己當年嘅參選單張，仲話自己一直做番自己，始終如一。


睇番當年嫻姐嘅參選政綱，其實佢都走得好前，佢1991年參選立法局時，選舉單張已經寫明要爭取盡快落實一人一票嘅普選；勞工議題上又要求撤銷輸入外勞呢個政策，當時未回歸，嫻姐已經關心中港問題。睇番嫻姐嘅選舉單張，可見嫻姐個樣都無乜變，最大轉變都係髮型，唔似現時唔少參選人，單張隨時執到自己唔同晒。近日青年新政嘅游蕙禎喺地區掛起橫額力sell青春，嫻姐就笑言自己當年都有類似形象！


嫻姐一直關注土地、社區規劃，佢就透露有學者知佢唔再參選，游說佢一齊籌組政黨專研究有關議題，嫻姐就話自己可以參與研究，但對要一齊籌組政黨就耍手擰頭喇。