新聞類別
副刊
詳情#
【明報專訊】近年立法會不時有議員以重複發言嚟拉布，由立法會前秘書長吳文華（Pauline）主筆、立法會耗時3年半製作嘅《立法會歷史、規則及行事方式參考手冊》近日出版，Pauline噚日同主席曾鈺成一齊舉行記者會介紹手冊，Pauline就透露主席原來仲有一把「尚方寶劍」可以應對呢種拉布，但主席從無用過。究竟係乜嘢方法呢？
Pauline話，原來議事規則第36條列明，議員發言時要起立，但喺大會或者二讀通過後嘅全體委員會會議，主席如果起立，所有議員都要坐低，即係無得發言。Pauline話自己2012年退休前，已經向主席提議用呢條規則，但主席認為議會「未到呢個情况」。
曾鈺成強調，現有議事規則唔會因手冊而有所加減，講笑話傳媒日後問到有關裁決問題，可以參考手冊，「咁我就可以唔答」。至於議員睇完手冊會唔會少啲拉布呢？主席就回應「我好懷疑」，打趣話議員反而可以喺手冊搵到其他拉布空間
留言 (0)
