法政匯思 七一賣「超乜然記事簿」

【明報專訊】每年七一遊行都有唔少團體沿途擺街站宣傳，法政匯思今年都趁熱鬧，喺灣仔軒尼詩道擺街站賣嘢，佢哋製作咗2000本狂窒特首及法律界人物嘅「超乜然？」記事簿售賣。律師幫擺檔，當然跟足法例做，一早已申請臨時小販牌照，唔會做超然無牌小販。


講番佢哋本記事簿，售價雖然要100元，但實際上唔係一本簡單嘅拍紙簿，內頁有過癮漫畫同字句，例如「梁特首﹕行政長官地位的確係……超然」、「林新強﹕我覺得共產黨好偉大」、「何君堯﹕唔係殺市民，係殺暴徒」，仲有鼠王公仔圖案搭一句「梁美芬﹕建制派是神給予我的政治角色」。


嗱，佢哋狂窒律師會前會長及政界人物，咁又點可以少咗民建聯大律師馬恩國嗰份呢，所以都有馬大狀擦鞋漫畫，配以金句「我甘願與岳飛一起，做一個保家衛國的擦鞋仔」。