最佳旅點 大堡礁第1 香港第17

【明報專訊】香港旅遊業表現最近有啲下滑，但對外地客嚟講仍有吸引力。美國U.S. News & World Report綜合專家同旅客意見，選出澳洲大堡礁為2016至17年最佳旅遊景點，U.S. News旅遊編輯認為，大堡礁係一生中必去景點，可惜珊瑚因為海水溫度上升而逐漸白化，要盡早遊覽。法國巴黎、意大利佛羅倫斯、英國倫敦都上榜，香港就排第17。網站形容香港古今、中西文化交融，既有迪士尼，亦有古老寺廟，值得一遊，尤其推介旅客乘搭天星小輪，欣賞維港美景。


除咗大城市，榜上不乏大自然美景，位於南太平洋嘅法屬玻里尼西亞波拉波拉島（Bora Bora）排第3，除喺島上度假村享受悠閒假期，亦可遊覽茂密叢林同高聳火山，但網站提醒旅客，遊覽「太平洋天堂」嘅使費唔平㗎。Emily格過價，香港往返波拉波拉島要喺新西蘭轉機，票價4萬幾元；島上五星酒店每晚房價大約1.5萬元。


另外，海洋公園今年暑假再有「夏水禮」，星期五開始到8月28日嘅「海綿寶寶夏水派對」以卡通海綿寶寶為主角，設計多款消暑遊戲，好似「激光迷陣」，挑戰者將會喺漆黑一片嘅密室同老友鬥快穿越激光；「珍寶肥皂泡工場」可自製真人大小嘅巨型泡泡；超巨型大水桶「超級巨冲」注滿水後由高處傾盆而下，炎炎夏日透心涼。至於熱愛水上活動嘅朋友，可嘗試夏日限定「海洋全接觸」，喺「海洋奇觀」水族館中浮潛，欣賞珊瑚魚。