出書談英語路 肥彭寫序讚好 曾主席原來係Grammar王子

【明報專訊】立法會主席曾鈺成（Jasper）最近成日大玩猜謎，最近仲喺專欄出英文拼字遊戲「anagram」，考起唔少讀者，原來今年曾主席仲喺書展出新書，大談學英文嘅心路歷程。Emily一打開佢本書，見到前港督彭定康為佢寫序言，肥彭仲大讚曾主席英文了得，Emily係時候好好向曾主席學習一下。


出版社搵肥彭 無「勾結外國勢力」

曾主席出嘅書名為《英語•人生 曾鈺成》，前港督彭定康為佢寫序，大讚佢英文非常好，文法同發音都十分正規（Jasper's English was extremely good, grammatically correct and with a rather formal resonance）。Emily問佢係唔係「勾結外國勢力」，佢即時話係出版社搵肥彭嘅，唔關佢事。佢最近因為成日玩猜謎，咁有無聽到有微言呢，曾主席就表現輕鬆，仲話幽默感都係政治領袖需符合嘅特點。問佢會唔會玩少啲？佢就笑笑口話前日先出完一篇，都幾得意咁話。


呢本書一共6章，由曾主席出世講到家成立新智庫，佢本身讀中文小學，但為咗學好英文，努力考入聖保羅書院，又話細個已對英文文法特別有興趣，仲因為咁，有老師讚佢係「Grammar Prince （文法王子）」，多年後佢走入政途，要接觸唔同國家嘅人，就更加無悔細個花時間學好英文。