英獨聯內訌 招顯聰退黨選立會

【明報專訊】曾因為擅闖中環軍營被判緩刑嘅社運人士招顯聰，前日以「香港歸英獨立聯盟（英獨聯）」發言人身分宣布參選，但事隔一日就出現戲劇性發展，「英獨聯」facebook專頁噚晚發帖文，話因為雙方對「獨立」嘅見解不同，組織希望「君主立憲」，但招顯聰提倡「共和國」，所以已經分道揚鑣，招顯聰唔會再以「英獨聯」身分出選，又話對方嘅政綱同記者會發言都同組織無關。


對於點解喺一日內迅速割席，招顯聰向Emily解釋，話因為雙方對港獨嘅理念不同，所以自己主動離開，亦有兩個成員跟佢一齊走，但強調自己一定會以獨立身分繼續選立法會，形容係「無懸念」，不過另組政團嘅機會唔大。招顯聰前日喺政綱聲言要成立「自衛隊」，退出英獨聯會唔會令計劃有變呢？佢就回應「我寫嘅政綱理念唔會變」。