屢轟港台今轉軚 樹根：倘贏立會撐起大樓

【明報專訊】民建聯鍾樹根近期人氣旺盛，曾經多次批評香港電台嘅佢，早前錄影港台電視節目《早辰．早晨》就轉口風、賣口乖，話自己由1970年代聽港台聽到家，同時開出一張大支票，聲稱如果9月可以返番立法會，「我支持你哋80億（撥款起新大樓），100億都支持」。如果最終唔可以參選呢？樹根就叫港台考慮請佢做節目主持人，因為自己「夠搞笑」、「質人仲勁」喎。


樹根曾經反對新大樓撥款，形容造價有如「千金小姐任意揮霍」，又講過港台管理不善，唔可以再「放任自由」、「散播亂港危害社會穩定嘅歪風」，但佢喺今次節目就無擺出戰鬥格。節目有烹飪環節，樹根被問到呢期人氣旺，民建聯有無可能畀佢喺港島直選排番頭位呢？樹根一邊炒麵，一邊語帶雙關話「我哋不可以翻兜」，又形容「殘酷一叮即食麵，隨時被叮走，無得留低」。


講到同民建聯嘅關係，樹根慨嘆喺民建聯咁多年，都有啲感情，但就話自己姓鍾，「樣子唔似鍾無艷，命就有點似」，形容自己從政時機唔好，等到50幾歲先上位，但上位之後就被人「話你夠鐘」。