新聞類別
副刊
詳情#
【明報專訊】立法會議員梁美芬因搵人捉老鼠而得「鼠王芬」稱號，估唔到官仔骨骨嘅楊岳橋，都對老鼠呢個議題感興趣。楊岳橋喺大埔墟街市做調查，九成受訪商戶話經常有老鼠出沒，咁梗係影響做生意同衛生。楊岳橋今次唔係叫鼠王嚟捉老鼠，而係做貓星人，提出食環署放寬限制，容許部分街市檔戶合法養貓，因為現時已有個別商戶偷偷養貓，而老鼠真係唔敢走埋呢啲檔口。
檔戶曾見百鼠出沒 偷養貓治鼠
立法會選舉前，各黨派都肉緊啲關注地區事務。楊岳橋就話早排喺大埔墟街市做問卷，訪問咗79個商戶及470幾個顧客，近七成受訪者都認為街市衛生環境要改善。有雜貨舖女檔戶就同Emily講，見過夜晚7點幾收檔後，過百隻老鼠喺街市內開party，嚇到佢花容失色，而佢近3年喺檔內偷偷咁養咗隻貓，日頭收埋佢喺紙箱瞓，夜晚就留喺檔內做看更，結果老鼠唔敢走近檔口。女檔戶話都好驚被食環署捉到佢養貓，每當有食環署人員巡邏，其他商戶都會通風報訊叫佢收埋貓貓。
有街市雞蛋檔商販就自保，喺檔口天花加裝鐵絲網，收檔後封密檔口，唔畀老鼠走入去偷食。呢個檔販話附近亦有商販養咗貓，所以做鄰居都受惠，老鼠都無咁猖獗。
楊岳橋就話本周約咗食環署傾傾街市衛生及滅鼠問題，佢認為政府應喺思維上做啲改變，有多啲唔同想像，包括容許商販喺街市有條件養貓。佢話如果食環署容許，街市商會可做登記制度，確保貓獲妥善照顧及控制數量。至於會唔會請「鼠王芬」跨區幫手，楊岳橋講笑話擔心屆時更多老鼠湧出嚟！
回應 (0)
