民記公布 屯門人最關注假難民

【明報專訊】選舉臨近，政黨都開始打地區牌，噚日民建聯立法會議員梁志祥、區議員周浩鼎等就公布屯門人十大民生事項，喺區內訪問1361名市民，問佢哋關注咩議題，結果排第一位嘅議題，就係民建聯過去不停講嘅「打擊假難民」，因為區內曾發生假難民涉嫌犯案嘅事，唔少居民都擔心區內治安受影響喎。民建聯建議警方加裝天眼同加強巡邏，又話要加快遣返假難民。


至於第二位嘅係希望改善屯門公路轉車站服務，包括希望加建洗手間、增加轉乘優惠等；第三係改善醫療券，民建聯話希望將醫療券合資格年齡由70歲下調至65歲，令更多長者受惠。其他市民關注嘅議題，唔少都同醫療、交通有關，好似公立牙科服務，希望盡快設公營牙科診所、改善屯門醫療系統；加快興建西鐵南延線、善用屯門碼頭、調低港鐵票價等。