中國衛生新主 枱底揸五成股份？

【明報專訊】細價股向來多糾紛，好似近排中國衛生（0673），就有新舊股東大混戰。上星期新股東應偉收夠飛投票成功將舊股東踢出董事局，不過前主席兼出局股東之一賈虹生就發文投訴，話應偉之前喺佢面前揚言自己枱面揸兩成（股權），枱底其實已揸足四、五成，前後有近7億股咁多，十足少林足球強雄咬住雪茄講，球證旁證足協足委都係我嘅人咁。結果最後係8.9億股撼贏1億多股，現有管理層輸晒。


被指一個人玩晒 踢走舊股東

賈虹生就話對證監會未有行動好失望，小琴反而諗，可能證監真係開咗file，不過佢哋一般都唔會話你知，隨時查番三五七年先再公布。除咗賈虹生申訴外，小琴仲收到料，原來有兩個小股東已去信聯交所上市科話有人入局後但無提出全面收購，希望中國衛生方面能夠交代云云。


小琴唔知邊個啱邊個錯，不過搞成咁最無辜係小股東，希望佢哋都係及早離場罷啦。


email: piano@mingpao.com

[小琴密語]