今拉隊訪京 劉業強否認告御狀

【明報專訊】新任鄉議局主席劉業強（發仔）今日會帶領逾40名鄉紳訪京4日3夜，今次係鄉議局自1983年來第八次訪京，距離上次訪京已相隔8年，適逢今年又係該局90周年，所以大家都好重視。行程安排會見港澳辦、統戰部和全國政協，不過就未知會見到咩官員。


不過，最近鄉議局有唔少風雨，包括不滿民建聯背信棄義、鄉事搞組黨，套丁問題又引來鄉事不滿，唔通佢哋今次直接告御狀？劉業強就否認係去打小報告，此行主要目的係介紹鄉議局新班子，又同中央反映吓新界權益問題，包括丁屋、規劃等。不過被問到點解唔同港府反映，發仔就話有啲事想直接同中央交流。


對於早前傳出副主席林偉強有意挑戰發仔，爭奪立法會鄉議局議席，十八鄉鄉事委員會主席梁福元噚日喺鄉議局開會時就搞咗場「大龍鳳」，展示過百名鄉議局執行委員聯署，力挺發仔參選。劉業強接過聯署信，又同支持佢嘅執委合照，表示會積極考慮參選。梁福元話，有超過一半執委聯署，認為新界人近年受到不平等條例衝擊，困擾不安，希望新界唔好被分化。對於傳言，林偉強就回應，如果劉業強參選係佢哋首選，會全力支持，但又話一日未到報名參選截止日期，任何人都有可能參選，似乎未完全閂閘。