立法會搞梁營矛盾飯局 梁美芬無預梁振英

【明報專訊】立法會噚日搞咗個「梁營」飯局，但就無預梁營最高領導人梁振英！其實呢個立法會梁營，議席數目有8票咁多，佢哋噚日首次聚餐，牽頭人係經民聯梁美芬，會計界梁繼昌就協助拉攏。呢個梁營嘅人走埋一齊，純粹係因為想趁立法會任期完結前食餐飯傾吓偈。噚日出席嘅有6名梁議員，佢哋政見同立場都好明顯唔同，梁美芬就講笑話，「姓梁嘅議員咩顏色都有，係海納百川」。


與長毛同枱 傾閒偈 無鬧交

立法會梁營應該有8人，但公民黨梁家傑及經民聯梁君彥分別離港或有要務出席唔到，餘下6人都食得好高興。飯局開始時只有5人現身，唔見長毛梁國雄，仲以為長毛唔想同梁美芬參加「矛盾飯局」，但其實長毛噚日掛住去示威，所以遲到。長毛同梁美芬喺議會內成日針鋒相對，但梁美芬話席間無同長毛鬧交，大家都係風花說月，飯局氣氛融洽。出席嘅梁耀忠就證實，大家都係傾吓閒偈，費事食飯都講工作啦。


梁美芬話呢餐梁營飯局足足約咗兩年，直至立法會任期完結前先成事，佢話各人政見唔同，如果大家肯溝通多啲，議會矛盾都少啲。


立法會梁營有8人，都算係「大黨派」，但有網民就心水清，話「陳營」其實都一樣有8人，政治光譜一樣闊，唔知遲啲會唔會見到陳營飯敘呢？