中西合璧 港赴法國葡萄酒節演粵劇

【明報專訊】星期四就係兩年一度嘅法國波爾多葡萄酒節，香港再獲邀為10個榮譽城市之一，係亞洲唯一上榜城市。旅發局計劃以「中x西」為主題，突出香港中西合璧特色，除咗攤位設計成傳統大戲棚，仲有年輕藝術家與名廚同行。醉心粵劇嘅王侯偉、譚穎倫同袁善婷將演出《宴舞醉楊妃》，故事講唐明皇同楊貴妃秋天同遊御花園賞花飲酒，唐明皇請愛妃演唱李白作品《清平調》。


王侯偉話，帝皇情侶本應有太監宮女侍候，但今次遠赴法國帶唔到咁多人，唯有微調，就算台上只有兩個人，都要演到皇家氣派；至於旦角醉酒嘅高難度指定動作——落腰，就當然唔少得。除咗粵劇演出，佢哋會即席教賓客粵劇造手，又會畀人試穿戲服同化粵劇妝。


至於舞蹈家胡錦明、何康汶、游家傑則同場演出水袖舞同踢躂舞，兩種截然不同嘅舞蹈，希望帶出古今交融、對酒當歌嘅感覺。睇完表演自然要醫肚，米芝蓮三星廚師「廚魔」梁經倫、人氣廚師May Chow將分別炮製中法fusion菜。