財爺：80後職場上流空間不俗

【明報專訊】6月係畢業生搵工進入「社會大學」嘅季節，財政司長曾俊華噚日發表題為「力爭上游」網誌，講到向上流動機會，認為政府須維持香港「優秀和國際化營商環境」。佢話，近年不時聽到意見話近代畢業生上流機會減少，起薪點相對偏低，發展前景亦不及「前輩」，但佢就話畢業生長遠嘅收入流動性，比起薪點可能更重要。財爺又引述上月公布嘅政府研究報告，話兩批出生於上世紀80年代嘅「80後」，喺職場上都擁有不俗嘅上流空間；具體而言，學士課程畢業生嘅收入喺10年間平均有逾兩倍嘅實質增幅。


收入流動性或比起薪點重要

財爺話，政府除繼續為青年人提供全面知識培訓、就業支援同生涯規劃外，更重要係維持「香港優秀」和「國際化營商環境」，促進經濟發展，又會鞏固傳統產業優勢，推動創科和文化創意等新興產業發展，為年輕一代帶來更多高技術高增值職位。


另外，財爺噚日出席2016無家者世界盃香港代表隊授旗禮，鍾意運動嘅佢話體育比賽可以鍛煉人嘅拼搏精神同意志，學識面對逆境同失敗。