許智峯花紅風波 民主黨不再跟進

【明報專訊】民主黨中西區區議員許智峯因為舊年將一筆11.9萬嘅區議會實報實銷津貼，派咗畀3個職員當做花紅，有黨內成員質疑佢唔適當運用公帑。許智峯前日已經就事件向公眾致歉，承諾會捐出11.9萬畀政府關愛基金。民主黨中委噚晚開會討論，接納佢致歉同捐款嘅做法，決定唔會再跟進事件。


中委會接納許致歉捐款

「分花紅」事件喺民主黨內部惹起爭議，民主黨喺月初嘅中委會度，曾經動議取消許智峯參選立法會嘅資格，但最終達唔到通過門檻。不過，黨內就成立三人小組跟進。噚晚民主黨中委會開會，接納小組報告，決定唔再跟進。


立法會議員單仲偕開完會後見記者，都被問到係咪要「換馬」，佢話如果真係要換，一早就換咗啦。


單仲偕強調，黨內已有共識，唔會再就呢件事做任何跟進。至於黨內有無因此激烈爭辯，佢話黨內一向都可以暢所欲言。