楊永強彈細口垃圾桶離地

【明報專訊】近排各區陸續換上細口垃圾桶，但有人將大件垃圾扔喺垃圾桶附近。曾任衛生福利及食物局長嘅中大賽馬會公共衛生及基層醫療學院院長楊永強，噚日喺設計「智」識周，大談以理論構思嘅設計同用家行為差異時，就拎新垃圾桶做例子。佢話新設計唔以人為本，指公眾一向認知垃圾桶用嚟收集垃圾，當投口唔夠放垃圾，就有誘因將大件垃圾扔喺附近。


楊永強認為要減廢，唔係增加扔垃圾難度，係要令市民更易回收垃圾。佢從用家角度分析，指扔垃圾嘅人見到垃圾桶，就好少特登搵回收箱，建議將垃圾桶同回收箱放近啲，教育市民回收。


食環署話新設計係想市民逐漸改變扔垃圾習慣，將家居垃圾扔喺大廈垃圾收集設施或食環署垃圾收集站；會加派人手喺衛生黑點加強執法，包括檢控扔垃圾喺垃圾桶隔籬或頂部嘅人。