SOPA頒獎禮 明報奪6獎

【明報專訊】亞洲出版業協會（The Society of Publishers in Asia ，又稱SOPA）噚晚舉行「2016年度卓越新聞獎」頒獎禮，《明報》同事又豐收，成晚上咗台6次攞獎，包括3個大獎同3個優異獎。其中舊年5月底出街嘅「長者遭脫光露天等冲涼」系列報道最厲害，明報偵查報道組攞到兩個獎，分別係「卓越人權報道大獎」及「卓越獨家新聞優異獎」。


而攝記鍾林枝嘅「前特首曾蔭權被廉署落案起訴」新聞相片，則獲「卓越新聞攝影大獎」。另外，港聞組、中國組、攝影組同事舊年12月幾乎幾晚通宵採訪而製作嘅「深圳光明新區塌泥事件」報道，最後獲「卓越突發性新聞大獎」。


「幕後」手足亦表現出色，美術組王炳賢同編輯曾祥泰憑一個展示香港樓市狀况嘅全版美術圖「轉角一年 港未安居」，奪得「卓越數據圖像優異獎」；而長期喺明報畫政治漫畫嘅尊子，佢嘅「黑手干預港大校政系列」就奪得「卓越漫畫優異獎」。


馬英九未能到場 無損氣氛

SOPA已有30幾年歷史，每年頒獎畀新聞從業員，得獎作品來自唔同中英文刊物，有印刷出版，亦有網站同通訊社。雖然原頒獎嘉賓、台灣前總統馬英九未能親身致辭同頒獎（相關見另文），但無影響到噚晚嘅氣氛，逾百新聞工作者聚首一堂，為優質新聞互相祝賀。