譚允芝「成功爭取」小提琴可當手提行李

【明報專訊】大律師公會主席譚允芝（Winnie）最近喺facebook貼咗張電郵截圖，話收到國泰高層回覆，決定容許國泰同港龍嘅乘客，將小提琴等小型樂器當做手提行李帶上機。Winnie叻叻豬「成功爭取」，佢亦大讚今次國泰從善如流，話其實只要好好地講，唔好乜都推人哋埋牆角，人哋係會聽到你嘅意見，呢樣嘢好啱家嘅香港社會。


Winnie話大概喺2010年，當時佢陪18歲寶貝女搭港龍去北京演出，辦理登機手續時，職員話小提琴可以當手提行李，但正式登機時就話只可寄艙，好彩最後小提琴無穿無爛。諗起之前行李門事件，Emily問Winnie嗰陣有無表明身分，佢就笑笑口話自己只係小市民一個。


第二年，由Winnie做聯席主席嘅音樂基金邀請內地知名音樂家來港表演，點知港龍職員話小提琴只可以寄艙，音樂家當然唔制，於是即刻出錢買過另一間航空公司嘅機票。自此之後，佢啲音樂朋友如果拎住小提琴，都唔會搭港龍。Winnie又話全世界好多航空公司都畀小提琴做手提行李，唔明點解淨係港龍唔得。


直到上個月，譚允芝咁啱同國泰航空服務董事詹善仁食飯，傾開呢個規定，又話港龍因為咁損失咗唔少音樂界嘅生意。詹善仁聽到就話會研究吓，結果譚允芝噚日就收到好消息。國泰發言人噚日回覆話，國泰同港龍將會就攜帶小型樂器以手提行李登機作出統一規定，將會喺夏季稍後時間公布。