贊成綠化屋頂 建築師：計負荷力係common sense

【明報專訊】城大運動中心早前發生綠化屋頂倒塌事件，著名本地建築師呂元祥個仔呂慶耀（Bryant，圓圖），原來都曾經幫城大新大樓做建築同綠化工程，佢認為計算屋頂負荷同植被重量係業界常識，希望市民唔好因為單一事件，就認定所有綠化屋頂都係危險，忽視其對減排同減低熱能嘅正面影響。


Bryant負責嘅學術樓（三）喺2013年啟用，佢話平台上有大片草地，甚至種咗十幾棵樹，所有綠化工程都有向屋宇署交圖則，「計算建築物負荷能力同植物重量係common sense（常識）」。佢又話倒塌事件調查報告都指出有關人士可能用錯舊數據計數，最終釀成悲劇。佢認為嗰次倒塌係單一事件，市民唔應該因而抹煞綠化屋頂對城市降溫同通風嘅好處。


另外，第17屆亞洲建築師協會周年大會首次由本港主辦，今屆主題正係綠色建築，身兼大會籌委會主席嘅Bryant話大會每兩年舉辦一次，將於9月26日至10月1日舉行。屆時多個來自日本等地嘅建築師會簡介新環保建築技術，並同本地業界交流，探討點樣利用建築改善居住環境同減低能源消耗等。