幫港出聲搞《五個小孩》免費放映會

【明報專訊】由周融牽頭嘅「幫港出聲」同「保普選保和平大聯盟」近期動作頻頻，繼早前公布打算合辦5000人手牽手圍太平山活動，噚日再獻新猷，打算6月底至8月中喺香港各個地區搞免費放映會，播去年上映、現時電視台都有播嘅《五個小孩的校長》。周融話已向電影商攞到版權，由地區機構安排播放，宣揚正能量，現時未知總共播幾多場，但就「肯定好多」，起碼超過100場。


早前《十年》社區放映遍地開花，被問到係咪有意仿效，周融強調社區放映一直存在，又形容《十年》帶負面信息，有自殺同爆炸場面，唔符合正能量標準。立法會選舉在即，周融強調近期搞活動同選舉無關，幫港出聲同大聯盟唔會派人出選，亦唔會為任何人站台，只係咁啱喺6至8月「有啲嘢做」，形容唔係為選舉做，係為暑假做咁話。