點睇搵阿叻傳聖火？ 霍震霆：或考慮娛樂性

【明報專訊】四年一度嘅奧運8月將喺巴西舉行，藝人陳百祥（阿叻）成為本港唯一傳遞奧運聖火嘅火炬手，唔少網民好有意見，質疑點解唔係由運動員代表香港去傳聖火。港協暨奧委會會長霍震霆（圓圖）噚日出席一個公開活動，就被記者問到點睇阿叻代表香港做火炬手，佢就話，無綫或其他機構或者都係考慮娛樂性。


霍震霆呼籲大家應該由運動員角度出發，畀佢哋最大支持同鼓勵，又希望官方多宣傳，等大家了解吓香港運動員嘅備戰經驗。立法會選舉就到，曾經擔任體育、演藝、文化及出版界議員多年嘅霍震霆，被問到點睇業界代表馬逢國嘅表現，佢就話對方既然選到做議員，相信表現係點大家都睇到喎。咁佢又點睇馬逢國之前批評記者喺立法會走廊食飯嘅言論？霍震霆就同記者講，自己離開議會好耐，都好掛住大家，仲講笑話本來想請記者食飯，但講完隨即轉身離開。