譚文豪鐵騎遊行爭區區有得泊

【明報專訊】公民黨九龍東支部副主席、民航機師譚文豪除咗識揸飛機，揸電單車亦有板有眼。佢噚日發起電單車遊行，帶領車隊由九龍灣國際展貿中心出發，去政府總部遞交請願信，要求政府正視電單車車位不足問題，爭取更多電單車泊位，希望「區區有得泊」。


根據運輸署統計，電單車領牌數量由2012年39,741輛，上升至現時嘅47,697輛。但泊位數目遠追唔上車嘅增幅，2012年約有28,500個泊位 ，到今年1月上升到31,400個。同時，領展喺多區削減電單車泊位，將泊位改為私家車位。


譚文豪話會爭取更多電單車泊位，仲會發起行動，針對長期被遺棄喺路邊、霸佔車位嘅「死車」，希望市民主動舉報，以便騰出電單車位解決泊位之急。