一國兩制喻一帶一路 王振民﹕政策開始總係抽象

【明報專訊】國家推動一帶一路政策，特區政府以至民間多個團體落力配合，噚日由全國政協委員王貴國，以及佢太太、經民聯立法會議員梁美芬分別擔任院長同副院長嘅「一帶一路國際研究院」，就舉辦「第三屆一帶一路國際論壇」，邀得署理特首林鄭月娥、中聯辦法律部長王振民等做嘉賓。或者知道市民唔多了解咩係一帶一路，王振民致辭時話，任何政策開始時都好抽象，但相信日後就會愈來愈重要。


王振民話，好似已故中共領導人鄧小平提出一國兩制咁，當時好多人都覺得抽象，但最終亦變成政策，仲有《基本法》去落實，而一帶一路亦然，佢話國家主席習近平2013年提出時，唔少人都唔了解一帶一路係咩，但現時都好清晰，亦了解一帶一路好重要。


林鄭月娥致辭時，就引述番全國人大委員長張德江5月訪港時，提到中央表明支持香港喺一帶一路可以做四方面貢獻，又話香港喺物流等方面都係最理想嘅連接點。