劉展灝去世後 促標時立法保健康 街工黃潤達抽錯水道歉

【明報專訊】身兼標時委員會資方代表等多項公職嘅香港工業總會名譽會長劉展灝，噚日不幸辭世，勞資雙方都有唔少人表達惋惜。不過，街工成員黃潤達喺劉展灝離世消息傳出無耐，就喺個人facebook頁面出帖文，話「如果有標準工時，不單止打工仔，我估老闆們都會少D出現心臟病的機會」，並寫上「請政府立法標準工時，保障市民的健康」。言論一出，隨即引起網民批評，帖文過咗一陣就被刪走。


話言論係針對社會制度

黃潤達其實同劉展灝喺上周六下晝先見過面，當時大家喺大埔出席有關標準工時嘅諮詢會，一齊做台下聽眾，其間街工代表向劉展灝掟假髮，鬧劉反對標準工時立法，黃潤達當時都有喊抗議口號，未料翌日劉逝世。


黃潤達噚日回應Emily查詢時，承認係自己刪走帖文，形容喺他人傷口上灑鹽唔恰當，所以收番言論，如果劉展灝家人對言論覺得唔舒服，佢表示歉意。佢話噚日帖文嘅出發點，係想講唔止打工仔，連好多老闆都要超時工作，僱員僱主同樣面對工時長嘅問題，聲稱自己言論係針對社會制度，唔係個人。黃潤達話自己喺表達上唔理想，但絕對唔係對逝者不敬，亦希望劉展灝家人節哀順變。佢話事後設身處地反思，如果自己有親人去世，都希望他人致以慰問。